Konsep Pulung

Paling ora ono telu konsep pemahaman "pulung". Sing sepisan, pulung iku nyata ana lan mujudake perlambang tumibane wahyu kanugrahan, kemujuran lan keslametan saka Gusti Kang Maha Kuwasa. Wahyu kanugrahan, kemujuran lan keslametan iku dudu perkarane manungsa wantah. Ana campur tangan saka tangan kang ora katon (invisible hands), tangane Gusti Kang Maha Kuwasa.

Sing kaping pindho, pulung minangka pangreh praja kaya dene pulung kaprajan, wahyu keprabon utawa Wahyu Cakraningrat. Pulung iku kaya cahyane lintang (Halley comet). Wong sing ketiban pulung dadi lurah, bupati, walikota, gubernur, pejabat negara lan uga presiden iku wong-wong sing nampa wahyu utawa pulung kaprajan. Mula banjur ana sesebutan "ketiban pulung". Istilah sing dienggo pancen "ketiban" dudu kesandhung, nemu, utawa entuk. Ketiban iku saka tembung "tiba". Tumiba mesthi asale saka ndhuwur. Pulung kaprajan asal usule saka garise pesthi lan peparinge Gusti Kang Maha Suci. Pemahaman iki nganggep yen pulung iku ana wujud fisik cumlorote lintang.

Sing angka telu, pulung iku mung mitos (myth) kayadene Kanjeng Ratu Nyai Roro Kidul lan sapanunggalane. Mitos bisa dicipta lan disebarake kanggo tujuan sosial utawa politis. Mitos iki umpamane, mungkin wae diciptakake kanggo mbentengi panguwasa raja-raja Mataram. Wong-wong sing arep ngrebut panguasane bakal mikir-mikir amarga sing diadhepi iku duwe dhekeng panguwasa ghoib ing segara kidul. Wallahualam bissawab.